Банката на Англија (BoE) ја зголеми референтната каматна стапка на 3,0 отсто од 2,25 отсто.
Тоа е најголем пораст на стапката од 1989 година, но таа ги отфрли пазарните прогнози за понатамошни нагли зголемувања, велејќи дека Британија се соочува со долга и болна рецесија.
Банката на Англија предвидува дека инфлацијата ќе достигне 40-годишен максимум од околу 11 отсто во текот на тековниот квартал, а исто така верува дека економијата на Обединетото Кралство веќе влезе во рецесија која може да трае две години, подолго отколку за време на финансиската криза 2008/09 година, пренесува Ројтерс.
Одлуката да се зголемат трошоците за задолжување – најголеми во последните 33 години, со исклучок на неуспешниот обид да се поддржи фунтата на Црната среда во 1992 година – не беше едногласна, со тоа што двајца од деветте членови на Комитетот за монетарна политика на BoE се залагаа за помали зголемувања за една четвртина и половина процентен поен.
„Можеби ќе бидат потребни натамошни зголемувања на каматната стапка на Банката за одржливо враќање на инфлацијата на целното ниво, но до максимум кој е понизок од проценките на финансиските пазари“, рече BoE во невообичаено специфичните упатства за инвеститорите.
Непосредно пред одлуката за монетарната политика, пазарите предвидуваа дека референтната каматна стапка ќе достигне максимално ниво од околу 4,75 отсто.
Британскиот министер за финансии Џереми Хант рече дека зголемувањето на каматните стапки на Банката на Англија ќе биде „многу тешко“ за семејствата со хипотеки низ целата земја и бизнисите со заеми, но дека глобалната економска криза е во тек.
„Најдоброто нешто што може да го направи владата, ако сакаме овие зголемувања на каматните стапки да се намалат, е да покаже дека го намалува својот долг. Семејствата ширум земјата треба да го балансираат буџетот на домаќинствата, а ние како влада треба да го направиме истото“, рече тој.
