Време е Шведска и Финска да влезат во НАТО, изјави вечерва во Истанбул Јенс Столтенберг, генерален секретар на Атлантската алијанса.
Столтенберг утре треба да разговара со турскиот претседател Реџеп Таип Ердоган, кој го блокира влезот на двете нордиски земји во Алијансата, обвинувајќи ги дека ги штитат, меѓу другото, курдските борци на Курдистанската работничка партија (ПКК), кои Анкара ги смета за терористи.
„Ја разбирам вашата загриженост“, рече Столтенберг на заедничката прес-конференција со турскиот министер за надворешни работи Мевлут Чавушоглу.
Чавушоглу рече дека има поголема доверба во новата шведска влада.
„Имавме мала надеж со поранешната шведска (влада), но новата влада е цврста по ова прашање, рече тој и потврди дека шведскиот премиер Улф Кристерсон ќе ја посети Анкара на 8 ноември на покана на турскиот претседател.
Досега 28 од 30 земји-членки на НАТО го ратификуваа приемот на Шведска и Финска, кој мора да биде одобрен едногласно.
Нивниот прием сè уште не е ратификуван од Унгарија и Турција.
