Северна Кореја истрела три балистички ракети со краток дострел во Источното Море и најмалку седум други проектили од различен тип, вклучително и една што беше насочена кон јужнокорејскиот остров Улеундо пред да падне во близина на источниот брег, соопшти Здружениот генералштаб на Јужна Кореја.
– Армијата на Република Кореја никогаш не може и нема да толерира ваква провокација од Северна Кореја. Јужна Кореја и САД тесно ќе се координираат, ќе реагираат строго и цврсто, наведе Јужна Кореја.
За прв пат проектилите паднаа во близина на јужнокорејскиот брег. Еден проектил падна на 26 километри јужно од северната демаркациона линија, еден на 57 километри од јужнокорејскиот град Сокчо на источниот брег и еден на 167 километри од Улелунгдо, објави Јужна Кореја.
Сеул одговори во средата три часа откако Пјонгјанг ја лансираше ракетата. Како одговор, тие лансирале три ракети, за кои официјални лица велат дека слетале на слично растојание долж северната гранична линија, пренесува Би-Би-Си.
Новите тестови дојдоа еден ден откако Северот им се закани на Јужна Кореја и САД поради нивните заеднички воени вежби.
– САД и Јужна Кореја ќе мора да се соочат со ужасен случај и да ја платат најстрашната цена во историјата – порача Северот.
Постои загриженост дека севернокорејскиот лидер Ким Џонг Ун можеби го подготвува теренот за првата нуклеарна проба по пет години.
Лансирањето претставува значителна ескалација на непријателствата низ полуостровот оваа година, на кој веќе се забележани повеќе од 50 лансирања на проектили од Северна Кореја – вклучително и една балистичка ракета што помина над Јапонија.
