Европската централна банка (ЕЦБ) мора да продолжи да ги зголемува каматните стапки за да се бори против инфлацијата, дури и ако се зголеми веројатноста за рецесија во еврозоната, изјави претседателката на ЕЦБ Кристин Лагард во денешното интервју за летонскиот весник „Делфи“.
„Нашата посветеност е стабилноста на цените и мора да го постигнеме тоа користејќи ги сите алатки што ни се на располагање. Решени сме да направиме се што е неопходно за да ја вратиме инфлацијата на целното ниво од 2,0 отсто“, рече Лагард, во голема мера повторувајќи ја пораката од минатонеделната сесија за монетарната политика, пренесува Ројтерс.
ЕЦБ ги зголеми каматните стапки за вкупно 200 базични поени во изминатите три сесии, а пазарите предвидуваат серија дополнителни зголемувања што ќе ја доближат основната стапка од 1,5 отсто до нивото од 3,0 отсто во 2023 година.
„Нашата дестинација е јасна, сè уште не сме таму. Ќе има дополнителни зголемувања на каматните стапки во иднина“, рече Лагард без да прецизира на кое ниво би можело да заврши зголемувањето на каматните стапки.
Инфлацијата во еврозоната се искачи на 10,7 отсто во октомври и се очекува да остане над целта на ЕЦБ од 2,0 отсто до 2024 година, што го зголемува ризикот од промена во однесувањето на деловните и домаќинствата бидејќи тие ја губат довербата во подготвеноста на ЕЦБ да ја заузда инфлацијата повторно под контрола.
„Колку подолго инфлацијата останува на толку високо ниво, толку е поголем ризикот таа да се прошири и да навлезе во сите пори на економијата“, рече Лагард.
