Израелскиот претседател Исак Херцог планира на неговиот американски колега Џо Бајден да му претстави фотографии кои наводно ја докажуваат руската употреба на ирански беспилотни летала за време на неговата посета на Вашингтон, објави неговиот кабинет.
Се верува дека фотографиите што Херцог ќе ги сподели со американските власти го прикажуваат иранскиот модел на беспилотно летало Шахед-136 лансиран за време на вежба во Иран во декември 2021 година и истиот тип на авион што беше соборен за време на борбите во Украина, пренесува „Тајмс оф Израел“.
Израелските безбедносни службеници анализирале фрагменти од остатоци од беспилотни летала користени во Украина и утврдиле дека тие се идентични со оние кои биле развиени во Иран, соопштија вчера од кабинетот на претседателот. Пред да замине за Вашингтон, Херцог нагласи дека „иранското оружје игра централна улога во глобалната дестабилизација“.
Во текот на изминатите недели, неколку западни претставници ја обвинија Русија дека користи ирански беспилотни летала за напади врз цивили и електрани во Украина, што и Москва и Техеран го негираа.
