Проблемите со меѓународните синџири на снабдување се олеснија пред празничната сезона, рече основачот и ко-извршен директор на „Flexport“, Рајан Петерсон, цитиран од „CNBC“.
Пристаништата се сè помалку пренатрупани, а цената на превозот оваа година значително се намали, коментира тој. Трошоците за испорака на контејнер од Азија во САД се намалија за околу 80%.
„Ова е навистина добра вест за секоја компанија која набавува од преку океанот, и на крајот за потрошувачите кои ги купуваат овие производи“, истакнува Петерсон.
Глобалните синџири на снабдување беа погодени од високи трошоци, долги одложувања, пренатрупани пристаништа и недостиг на контејнери за испорака за време на пандемијата. „World Container Index на Drewry“ – клучен показател за цените на контејнерите – достигна рекордни цени од повеќе од 10.000 американски долари во екот на пандемијата, во споредба со нивоата од 1.420 долари пред здравствената криза.
„Flexport“ им помага на своите клиенти да се справат со предизвиците на синџирот на снабдување, давајќи им поголема видливост и контрола на податоците врз нивните залихи. Компанијата беше на врвот на овогодинешната листа на „CNBC Disruptor 50“.
Намалувањето на трошоците за испорака е одраз на слабеењето на побарувачката за стоки и контејнери за испорака, вели Петерсон. Како што луѓето се прилагодуваат на начинот на живот по затворањето, тие трошат повеќе на искуства како што се патување и вечера надвор.
„Имаат толку многу пари за трошење“, коментира тој, додавајќи: „Трошат помалку на стоки, помалку стоки се испраќаат, има помала побарувачка, така што некои од проблемите стивнаа“.
Но, и покрај подобрувањата во синџирите на снабдување, Петерсон не е убеден дека индустријата научила многу од предизвиците на пандемијата. Според него, индустријата е циклична и каде во многу случаи имало недостиг, сега има изобилство.
„Нарачаа многу бродови, а сега веројатно имаме премногу бродови. Имаше моменти во 2016-та година кога имаше прекумерен капацитет, а ние сме токму таму, токму кога мислевме дека тоа никогаш нема да се случи“, вели Петерсон.
За стоките да стигнат од нарачката до вратите на клиентите, тие често мора да патуваат со камиони, бродови и авиони, а Петерсон вели дека може да биде тешко за компаниите да имаат видливост во целиот тој проток.
Многу океански превозници купуваат компании за транспорт и складирање за да се обидат да ја задржат контролата врз процесот, но Петерсон вели дека „Flexport“ работи на обезбедување податоци и алатки за дотичните компании за да не мора да поседуваат скапи средства.
Петерсон коментира дека компаниите за снабдување и логистика мора прво да ги разберат тековите на податоци за да спречат појава на идни кризи.
