Ружа Игнатова, позната и како „Крипто кралицата во бегство“, добила информација дека е под истрага за сомневање за измама со криптовалути, вредна четири милијарди долари, пред да исчезне.
42-годишната родена во Бугарија се бара поради нејзината наводна вмешаност во организирање и водење на измама со криптовалути позната како OneCoin.
Извештаите од состаноците на Европол, видени од Би-Би-Си, покажуваат дека Игнатова, која се наоѓа на листата на 10 најбарани бегалци на Федералното истражно биро на САД, неколку месеци пред да исчезне знаела дека полицијата ќе ја бара.
Френк Шнајдер, поранешен шпион и советник на Игнатова, ги сподели полициските документи со подкастот The Missing Cryptoqueen.
Шнајдер негира дека тој лично ги добил документите, но дека Игнатова му ги предала на мемориски стик.
Тој тврди дека метаподатоците во досиејата укажуваат дека Игнатова информациите ги добила преку нејзините контакти во Бугарија.
Шнајдер се соочува со можна екстрадиција во САД поради неговата наводна улога во измамата со OneCoin.
Европол соопшти дека го истражува случајот.
Игнатова исчезна на 25 октомври 2017 година, откако наводно дознала дека полицијата ја истражува нејзината криптовалута.
Во јуни 2022 година, таа беше на листата на 10 најбарани бегалци на ФБИ.
„Операција сателит“
Полициските досиеја содржат презентации направени на состанокот на Европол „Операција сателит“ во Хаг на 15 март 2017 година.
Според документите, на состанокот присуствувале претставници на ФБИ, американското Министерство за правда и окружниот обвинител во Њујорк.
Присутни беа и безбедносните службеници од Велика Британија, Германија, Холандија, Дубаи и Бугарија.
Меѓу документите се и детали за американски официјални лица кои имаат „доверлив доушник високо рангиран“, банкарски сметки на OneCoin на кои биле депонирани средствата на инвеститорите, како и детали за неуспешните обиди на британската полиција да ја испраша Игнатова.
ФБИ не ги коментираше документите на Европол, но специјалниот агент Пол Робертс рече во подкаст: „Во светот се водеа истраги за неа и криптовалутата што таа ја продаваше“.
Во 2019 година, американските обвинители тврдеа дека Шнајдер бил тој што и дал доверливи полициски информации, иако не е јасно дали наводите се однесуваат на протечените датотеки за кои се дискутираше во подкастот.
Тој негираше дека ги добил документите и рече: „Кога Бугарите учествуваа на одредени состаноци на Европол, ѝ беа потребни само часови да добие целосен преглед и да ги добие записниците од она што беше кажано на тие состаноци“.
„Можам само да заклучам дека тоа произлезе од круговите во кои таа беше и врските што ги имаше преку различни влијателни луѓе.
Документите покажуваат дека претставници на бугарското Министерство за внатрешни работи учествувале на состанокот на Европол во март 2017 година.
Министерството не одговори на прашањата на Би-Би-Си дали нивните претставници се одговорни за истекувањето на информациите.
Ниту една институција, правна или безбедносна, не потврди како се обелоденети информациите од таа средба.
„Ова сложено сценарио со многу заинтересирани страни ја отежнува проценката каде и како можел да се случи таков инцидент“, велат од Европол, потврдувајќи дека го истражуваат овој случај.
Американското Министерство за правда, Окружното обвинителство на Њујорк и полицијата во Дубаи не коментираа.
