Францускиот претседател Емануел Макрон ги критикуваше Соединетите Држави за двојните стандарди во цените на американскиот гас, кој е многу поевтин на нивниот пазар отколку на европскиот пазар.
-Постои избор кој го направи американската економија и тоа е атрактивен избор кој јас го почитувам, но од него произлегуваат двојни стандарди – цените на енергенсите во Америка се многу пониски од овде, бидејќи САД се производители на енергенсите. Цената на американскиот гас на домашниот пазар е три до четири пати пониска од цената по која ни го продаваат. Тоа се двојни стандарди – рече Макрон на прес-конференцијата по самитот на лидерите на Европската унија.
Францускиот лидер, исто така, истакна дека има намера да го покрене ова прашање за време на работната посета на САД во декември.
Елисејската палата претходно потврди дека Макрон ќе престојува во работна посета на Вашингтон на 1-2. декември.
Претходно германскиот министер за економија Роберт Хабек се пожали дека цените вртоглаво растат поради политиката на „пријателските земји“.
Германскиот канцелар Олаф Шолц претходно изјави дека Германија планира да разговара со Норвешка, Соединетите Американски Држави и други добавувачи на гас за можноста за намалување на увозната цена на таа енергија за Европа.
