Мора да се отстранат пречките за глобалните синџири на снабдување и да се преиспитаат принципите на глобалниот финансиски систем, што овозможува „златната милијарда“ на планетата да живее на сметка на другите, изјави рускиот претседател Владимир Путин во Астана, за време на неговoто обраќање на Конференцијата за интеракција и мерки за градење доверба во Азија (CICA).
Рускиот претседател пристигна во Астана, главниот град на Казахстан, каде во следните два дена ќе учествува на три мултилатерални самити, пренесува ТАСС.
Конференцијата за интеракција и мерки за градење доверба во Азија (CICA), чии 27 земји членки сочинуваат околу 90 отсто од територијата на Азија и речиси половина од светското население, се одржува во Астана, јавува руската агенција.
„Повикуваме на отстранување на сите вештачки, нелегитимни бариери кои го спречуваат обновувањето на нормалното функционирање на глобалните синџири на снабдување со цел да се решат итните проблеми со безбедноста на храната“, рече Путин во своето обраќање.
Тој изјави и дека Русија смета дека треба да се преиспитаат принципите на глобалниот финансиски систем, бидејќи сегашниот овозможил „златната милијарда“ на планетата да живее на туѓа сметка.
„Како и многу наши партнери во Азија, сметаме дека е неопходно да се ревидираат принципите на глобалниот финансиски систем, кој со децении ја дозволуваше самопрогласената таканаречена златна милијарда, која во голема мера ги затвори сите текови на капитал и технологија и да се живее на сметка на другите“, рече тој.
Путин укажа на постоењето на реална закана од глад и големи шокови поради нестабилноста на цените на енергијата и храната ширум светот, а според него, „тоа води кон влошување на квалитетот на животот и во развиените и во земјите во развој”.
„Постои реална опасност од глад и големи социјални превирања, особено во најсиромашните земји“, рече Путин.
Тој наведе и дека Азија, каде, според него, се зајакнуваат нови центри на моќ, игра голема улога во транзицијата кон мултиполарен свет.
„Азиските земји се мотори на светскиот економски раст“, нагласи Путин.
Тој зборуваше и за ситуацијата во Авганистан и рече дека „незаконски блокираните средства на Авганистан мора да се одмрзнат, а земјата да добие надомест за штетата предизвикана во годините на окупација“.
Според Путин, Авганистан останува еден од најакутните безбедносни предизвици во регионот.
Рускиот претседател рече дека земјата, како резултат на повеќе од 20 години воено присуство на САД и НАТО и неуспехот на нивната политика, не е во состојба сама да се справи со терористичките закани, што е потврдено со серија неодамнешни крвави терористички напади, вклучувајќи го и бомбардирањето на руската амбасада во Кабул на 5 септември.
