Прашината што се акумулира на радијаторите со недели или месеци го намалува ширењето на топлината, а во исто време ги зголемува трошоците за греење.
Имајќи предвид дека цените на енергијата растат, би било паметно да се вклучат радијаторите во неделното чистење. Треба темелно да се исчистат пред да го вклучите парното за прв пат во сезоната и потоа редовно да се брише прашина во текот на зимата, препорачува здружението на германските производители на средства за хигиена.
Доколку страдате од алергии, дополнително позитивно дејство ќе има чистењето на радијаторот. Радијаторите предизвикуваат проток на воздух, односно подигнуваат честички од нечистотија и прашина во воздухот, кои можат да завршат во респираторниот тракт или во очите.
Пред да започнете со чистење на радијаторите, ставете крпа или весник под него за да ги фатите грутките прашина или мртвите инсекти. За многу радијатори, четка долга 30-40 сантиметри ќе биде доволна. Може да се користи за чистење на просторот зад уредот и помеѓу „ребрата“.
Повеќето од денешните правосмукалки имаат и посебен додаток за радијатори.
Откако ќе ја отстраните прашината, пребришете го пристапниот дел од радијаторот со вода и некое средство за чистење за сите намени, но не користете сунѓери со груба површина, бидејќи тоа може да го оштети лакот.
