„Microsoft“ вчера објави дека ќе започне со откуп на користени „iPad“ таблети. Оваа понуда ќе трае лимитиран период и се истакнува дека оние кои ќе донесат „iPad“ би можеле да добијат барем 200 долари.
Секако, „Microsoft“ нема да исплаќа пари, туку ќе дава ваучери за купување во продавниците на „Microsoft“, со што, најпрво, ќе се обиде да ја зголеми продажбата на „Surface RT“ и „Surface Pro“ таблетите.
Оваа понуда ќе трае до 27 октомври, а од компанијата прецизираат дека за „нежно користените“ „iPad 2“ таблети, како и за третата и четвртата генерација на овој таблет, можно е да се добие ваучер од барем 200 долари.
Рекламата за оваа понуда очигледно е упатена кон оние кои размислуваат за купување на „Surface RT“ и „Surface Pro“ таблетите.
Новата иницијатива на „Microsoft“ доаѓа по трајното намалување на цената на „Surface Pro“ таблетот, кој сега се нуди за 799 долари за 32GB модел и 899 долари за 64GB модел.
