Се повеќе луѓе во Германија не се расположени за работа и одат на работа само затоа што мораат, покажаа резултатите од едно истражување. Речиси половина од вработените, 48 отсто од нив, сакаат да преминат на намалено работно време во договор со работодавачот.
Дури 56 отсто се изјасниле дека се подготвени веднаш да дадат отказ – но не можат бидејќи се принудени да работат од финансиски причини.
Податоците се резултат на годишното истражување на институтот „YouGov“, а во вторникот ги објави „HDI“, договорниот орган за осигурување. Во јуни и јули биле анкетирани 3.891 вработен на возраст над 15 години.
Пред пандемијата, во 2019-та година, само 41 процент од испитаниците изјавиле дека ќе престанат да работат доколку имаат доволно пари.
Повеќе од три четвртини од нив рекоа дека го поддржуваат воведувањето на четиридневна работна недела во нивната компанија, но огромното мнозинство со соодветна плата.
Посветеноста на работата опаѓа особено кај младите вработени: 58 отсто од помладите од 25 години велат дека не можат да го замислат животот без работа, во споредба со 69 отсто пред две години.
„HDI“ осигурување и Федералната агенција за вработување ги гледаат резултатите како знак за брзи промени на пазарот на трудот.
„Не е изненадување што барањата на компаниите и очекувањата на вработените во однос на нивните работни места и секојдневни животи брзо се менуваат“, рече Торстен Витаке, шеф на агенцијата за вработување во Северна Рајна-Вестфалија.
„Според резултатите од нашето истражување, особено младите вработени во Германија сакаат поголема слобода на работното место“, изјави директорот на „HDI“ осигурување, Кристофер Ломан.
Очекувањата на вработените се во конфликт со барањата на пазарот на трудот. Според податоците на Институтот за истражување на пазарот на труд и занимања, во вториот квартал од годинава имало 1,9 милиони слободни работни места, повеќе од кога било од почетокот на истражувањето.
Кадровската состојба во здравствените и згрижувачките установи е тензична, но има многу слободни работни места и во занаетите и во ИТ индустријата.
