Модниот трговец на мало „GAP“ укинува околу 500 корпоративни работни места, изјавија извори запознаени со ова прашање. Компанијата се обидува да ги намали трошоците додека нејзините приходи од продажба и профитот се намалуваат.
Работните места се првенствено во главните канцеларии на „GAP“ во Сан Франциско и Њујорк, како и во Азија, додаваат изворите. Гигантот отпушта вработени и ги елиминира позициите од различни сектори. Некои работници се известени за отпуштањата во последните денови, велат изворите.
„Дозволивме нашите оперативни трошоци да се зголемат со побрзо темпо од нашите приходи од продажба, а со тоа и нашата профитабилност“, напиша Боб Мартин, извршен претседател и привремен извршен директор на „GAP“, во обраќањето до вработените.
Компанијата доживеа години на опаѓање на приходите од продажбата на нејзината основна марка „GAP“, а неодамна се бореше со синџирот „Old Navy“, кој носи повеќе од половина од вкупните приходи.
Компанијата бара постојан извршен директор откако Соња Сингал се повлече од функцијата во јуни.
Минатата недела „GAP“ соопшти дека го прекинува партнерството со Канје Вест и дека повеќе нема да произведува облека под брендот „Yeezy GAP“, откако раперот ја обвини компанијата за прекршување на нивниот 10-годишен договор. Сепак, отпуштањата не се поврзани со раскинувањето со Канје Вест.
Во август, главниот финансиски директор на „GAP“, Катрина О’Конел, им рече на аналитичарите дека компанијата ќе бара начини да ги намали трошоците, вклучително и паузирање на плановите за вработување.
„GAP“ имаше околу 8.700 вработени во своето седиште заклучно со 29-ти јануари, според годишниот извештај. Вкупно, компанијата имаше 97.000 вработени во тоа време, од кои повеќето работеа по час во нејзините продавници.
Укинувањето на работните места на „GAP“ е најново во корпоративното работење на трговецот на мало, откако истото го направија „Walmart“, „Abercrombie & Fitch“ и „Stitch“.
