Со смртта на кралицата Елизабета Втора, многумина се прашуваат што ќе се случи со банкнотите и монетите на Комонвелтот, на кои беше прикажан ликот на монархот во поголемиот дел од нејзиното 70-годишно владеење.
Ликот на кралицата може да се најде на валутата на повеќе од 15 земји, меѓу кои најнаселени се Обединетото Кралство, Австралија, Канада и Нов Зеланд. Листата ги вклучува Бермудите, како и нациите кои го користат источнокарипскиот долар. Монетите во многу земји во Океанија го прикажуваат и портретот на кралицата.
Традицијата налага дека кралот Чарлс Трети ќе го замени ликот на Елизабета Втора на валутите на овие земји, иако тоа сѐ уште не е објавено во повеќето земји, пишува „CNBC“.
Во некои случаи, лицето на монархот може да се замени со нешто друго, како што направија некои земји од Комонвелтот во последниве години, вклучувајќи ги Јамајка и Сејшелите.
Но, да ги погледнеме забележителните промени во четирите најголеми земји каде британскиот монарх е присутен на валутата.
Велика Британија
Сликата на кралицата беше толку долго на британската валута што очигледно имаше одредена конфузија околу тоа дали парите сè уште важат по смртта на Елизабета Втора.
Во соопштението на властите оваа недела се појасни дека „кралицата ќе продолжи да биде законско средство за плаќање“ во Британија, како што е тоа во другите земји.
Се очекува портретот на кралот Чарлс да го замени портретот на кралицата на британската валута, а повеќе детали ќе бидат откриени дури по погребот на Елизабета Втора, се вели во соопштението на централната банка.
Во оптек се 4,5 милијарди банкноти, па нивната замена со ажурираната валута веројатно ќе потрае околу две години, пишува „The Guardian“.
Австралија
Централната банка на Австралија во вторникот потврди дека следната година ќе започне со ковање монети со ликот на кралот Чарлс Трети.
Во моментов, банкнотата од 5 долари на земјата го прикажува портретот на кралицата и останува законско средство за плаќање. Сликата ќе биде променета, иако сè уште нема гаранција дека ќе се користи ликот на Чарлс Втори, изјави заменик-министерот за финансии на Австралија, Ендрју Ли.
Во секој случај, сегашната банкнота од 5 долари нема да биде повлечена и ќе остане во оптек „со години“, се вели во соопштението на централната банка.
Канада
Во Канада, лицето на кралицата се појавува на монети и пластични банкноти од 20 долари. Министерството за финансии, кое го има последниот збор за промените во дизајнот, не објави никакви планови за тоа што ќе го замени портретот на Елизабета Втора.
Кралската канадска ковачница изјавила дека „промената на монархот не бара замена на монетите во оптек“.
Во меѓувреме, на социјалните мрежи се шпекулира за потенцијална замена на портретите на монарсите со нови дизајни. Истражувањето на јавното мислење спроведено од „Pollara Strategic Insights“ неколку дена по смртта на кралицата покажа дека 56 отсто од Канаѓаните би се спротивставиле на употребата на ликот на кралот Чарлс на валутата.
Нов Зеланд
Кралот Чарлс Трети ќе го замени ликот на кралицата на сите монети од Нов Зеланд, како и банкнотата од 20 долари.
Сепак, поради размислувањата за трошоците, не се планирани итни промени, а новиот дизајн ќе се појави „по неколку години“, соопшти централната банка на земјата.
