На неколку канали на Телеграм се појави видео од Евгениј Пригожин, попознат како „готвачот на Путин“, кој ја води озлогласената руска приватна воена компанија „Вагнер“. Видеото покажува како Пригожин им се обраќа на затворениците на руски и им нуди да се пријават за учество во војната во Украина. „Пријавете се, борете се во Украина и ако преживеете шест месеци, ќе одите на слобода“.
Обраќањето на Пригожин до затворениците беше преведено од руски на англиски од новинарот на „Волтстрит журнал“, Јарослав Трофимов.
„За првпат се појавија снимки од регрутирањето на Пригожин за Вагнер во руски затвор. Апсолутно лудо. „ Никој не се враќа зад решетки. Ако одлежиш шест месеци, ќе си слободен. Ако дојдеш во Украина и одлучиш дека не е за тебе, ние самите ќе те погубиме“, напиша Трофимов на Твитер, преведувајќи ги зборовите на Пригожин.
Објавеното видео очигледно ги потврдува претходните извештаи на „Волтстрит журнал“ дека Пригожин, олигарх и близок соработник на рускиот претседател Владимир Путин, регрутира затвореници за да учествуваат во војната во источниот регион Донбас во редовите на Вагнер.
Понудата на Пригожин до руските затвореници, снимена на лента, содржи неколку услови.
„Првиот грев е дезертерството. Никој не се повлекува, никој не се предава, никој не смее да биде заробен. За време на обуката ќе ви кажеме за двете бомби што мора да ги имате со себе доколку ве фатат“, вели Пригожин.
Ако прифатат да одат во војна, затворениците не смеат да се дрогираат или да консумираат алкохол и да се воздржат од грабежи и, како што рече Пригожин, „сексуален контакт со локалните жени, флора, фауна или мажи“.
Интересно е и како Пригожин ја опишува војната во Украина – потешка од војните што СССР и Русија ги водеа во Авганистан и Чеченија. „Трошиме 2,5 пати повеќе муниција отколку што беше потрошена во битката за Сталинград“, им вели Пригожин на затворениците.
„Готвачот на Путин“ наведува дека Вагнер прифаќа апликации од мажи на возраст од 22 до 50 години, но прифаќа и помлади под услов да имаат писмо во кое нивното семејство дава согласност.
„Зависниците се исто така добредојдени, но тие ќе бидат предмет на дополнителен мониторинг, кој вклучува детектор за лаги за да се утврди нивната стабилност“, вели Пригожин, додавајќи дека може да се пријават и сексуалните престапници.
„Ние сме многу внимателни околу нив, но разбираме дека луѓето грешат“, вели Пригожин и во обид да регрутира затвореници, тој зборува за првата акција на Вагнер во Украина во која учествувале затвореници.
„Првите затвореници што се бореа со нас, тоа беше на 1 јуни во електраната Вулехирска, тоа беа 40 затвореници од Санкт Петербург. Казнена колонија со висока безбедност, рецидивисти. 40 од нив влегоа во непријателските ровови, ги нападнаа со ножеви. Тројца загинаа, седуммина беа ранети. Еден од тројцата загинати имал 52 години, пред тоа одлежал 30 години затвор. Умре како херој“, вели Пригожин.
