Европската комисија има намера да се откаже од воведувањето на горната граница на цените на рускиот гас, но не и од планот за воведување данок на вишокот профит на енергетските компании, се наведува во објавен документ.
Нацрт-регулативата, која Гардијан ја виде, не содржи ограничување на цената за рускиот гас или за увезениот гас, откако земјите-членки не можеа да се договорат за лимитите минатата недела.
Се очекува ЕУ да воведе дополнителни даноци за високиот профит на компаниите за фосилни горива, со особено ограничување на приходот на производителите на електрична енергија со ниска потрошувачка на јаглерод.
Претседателката на Европската комисија Урсула фон дер Лајен во среда на годишното обраќање за состојбата на Унијата треба да го објави европскиот план за справување со поскапувањето на електричната енергија.
Конечниот текст може да се смени, но нацрт-документот ги открива сомнежите на ЕК за добивање доволно поддршка од земјите-членки на ЕУ за наметнување ограничувања на цените на рускиот гас како одговор на, како што ја нарекува руската употреба на гасот како оружје.
Земјите-членки на ЕУ кои увезуваат големи количини гас од Русија, вклучително Унгарија, Словачка и Австрија, се изјаснија против ограничувањето на цената на рускиот гас, бидејќи стравуваат дека Кремљ ќе го прекине целиот проток на гас, што ќе ги втурне нивните земји во рецесија.
Десетина земји, вклучително и Франција и Полска, би сакале да воведат ограничување на цената на целиот увезен гас, што тие го гледаат како подобар начин за задржување на скоковите на цените.
Холандија и Данска се претпазливи за какво било ограничување на цената, додека Германија стравува дека ограничувањето на цената на рускиот гас би предизвикало поделба.
