Годишната стапка на инфлација во Унгарија значително се намали во август, односно на 1,3 проценти од 1,8 проценти кои беа забележани во јули, што е најниското ниво од јуни 1974 година.
За ова најмногу придонесоа ниските цени на комуналните услуги, гасот и струјата, соопшти унгарската канцеларија за статистика, пренесува Франс прес.
Од јануари, унгарската влада ги принуди дистрибутерите на енергија да ги намалат малопродажните цени на гасот, струјата и греењето за десет проценти.
Изненадувачкиот пад на инфлацијата, според аналитичарите, би можел да ја охрабри централната банка да продолжи со намалувањето на референтната каматна стапка, и покрај флуктуациите на меѓународните пазари на капитал и растечките камати на обврзниците во многу земји во развој.