Два од најголемите американски производители на чипови добија наредба од американската влада да престанат да продаваат дел од нивната технологија на Кина која може да се користи за вештачка интелигенција (AI).
Nvidia Corp и AMD, компании меѓу најголемите светски производители на графички чипови, објавија дека американската влада ги повика да го запрат извозот на одредени чипови со високи перформанси во втората по големина светска економија, пишува CNN.
Nvidia Corp рече дека им било кажано од американски официјални лица дека тоа е потребно поради потенцијалниот ризик производите да се користат или да се пренасочат кон „воените крајни корисници“.
Ограничувањата се однесуваат на постоечките интегрирани кола А100 и најавените H100, како и на сите системи што ги вклучуваат и стапуваат во сила веднаш, се вели во соопштението на компанијата.
Закана за бизнисот
Тој потег се заканува да го намали бизнисот на Nvidia Corp за 400 милиони долари, според поднесувањето на компанијата до американскиот регулатор.
Тоа е приближно она што технолошкиот гигант со седиште во Калифорнија го предвиде минатата недела како потенцијална продажба во Кина, која би можела да биде засегната од новите ограничувања, според поднесувањето.
Акциите на Nvidia Corp паднаа за 6,6 отсто на затворањето во средата, додека акциите на AMD паднаа за 3,7 отсто.
