Австрискиот канцелар Карл Нехамер ја повика во неделата ЕУ да воведе плафон на цените на електричната енергија и да ги одвои трошоците за струја од цената на гасот.
Австрискиот лидер рече дека ако тоа не се направи ќе му овозможи на рускиот претседател Владимир Путин да ја „одреди европската цена на струјата“, пренесува Раша Тудеј (РТ).
„Конечно мораме да го запреме лудилото што се случува на енергетските пазари. А тоа може да се случи само со европско решение“, се вели во соопштението од канцеларијата на Нехамер. „Конечно нешто мора да се случи. Овој пазар нема да биде регулиран во неговата сегашна форма. Ги повикувам сите 27 членки на ЕУ да се здружат за веднаш да ја запрат оваа ценовна експлозија“.
Цените на струјата ширум Европа се врзани со цената на гасот, која сега чини околу десет пати повеќе од минатата година. Сепак, додека некои земји од ЕУ зависат многу од рускиот гас за греење и индустрија, тие користат алтернативни горива за производство на електрична енергија.
Австрија, на пример, произведува повеќе од три четвртини од својата електрична енергија од обновливи извори, според податоците на Меѓународната агенција за енергија од 2020 година.
Нехамер тврди дека одвојувањето на цените на електричната енергија и бензинот ќе доведе до поправедна сметка за потрошувачите што попрецизно ги одразува трошоците за производство на електрична енергија.
„Не можеме да дозволиме Путин да ја одредува европската цена на струјата секој ден“, додаде тој, алудирајќи на руската контрола на значителен дел од снабдувањето со гас во Европа.
