Американското Министерство за правда објави преработено соопштение за претресот на одморалиштето на поранешниот американски претседател Доналд Трамп. Протечениот документ, според Гардијан, би можел да понуди детали за наводните криминални активности кои доведоа до тоа агенти на ФБИ да упаднат во одморалиштето Мар-а-Лаго на Доналд Трамп на почетокот на овој месец, барајќи тајни документи кои поранешниот американски претседател ги зел од Белата куќа.
Трамп е под истрага за потенцијално лошо постапување со документи.
Објавениот документ има 38 страници, но голем дел е затемнет. Меѓу најинтересните откритија објавени е она на документите кои Трамп ги извадил од Белата куќа откако престана да биде претседател, а кои потоа беа предадени на Националниот архив. Од 15-те кутии предадени оттогаш, 14 наводно содржеле доверливи информации.
Имало основано сомневање дека има повеќе документи кои содржат доверливи информации на имотот во Мар-а-Лаго, Флорида.
Американското Министерство за правда го испочитува рокот што федералниот судија вчера го постави за да објави редактирана верзија на налогот за претрес на Мар-а-Лаго како изјава, јавува Си-Ен-Ен. Таа изјава го оправдува претресот на ФБИ на имотот на Трамп.
Понатаму, во делот за тајни документи, се наведува дека врз основа на прелиминарното испитување, кутиите содржеле „многу доверливи записи покрај секакви весници, списанија, печатени написи во весници, фотографии, разни отпечатоци, белешки, претседателски преписки, лични и постпретседателски записи“.
„Најголема загриженост беше тоа што високо доверливите записи беа расфрлани, измешани со други записи и на друг начин неправилно идентификувани“, се вели во судските документи.
Се додава дека некои од пронајдените документи се чини дека содржат белешки напишани со раката на поранешниот претседател.
Судот, како што јави Би-Би-Си, објави документ во кој го презентира оправдувањето на Министерството за правда за редакцијата. Судот констатирал потреба од заштита на дел од сведоците и учесниците во истрагата, како и на самата истрага.
Тој забележува дека владата идентификувала одредени информации кои мора да останат запечатени „за да се заштити безбедноста на повеќе цивилни сведоци чии информации биле вклучени во изјавата“ и да се заштити „интегритетот на тековната истрага“.
Соопштението за печатот првично се очекуваше да биде преработено поради чувствителната природа на истрагата и документите запленети од властите во Мар-а-Лаго.
