Високите сметки за енергија ќе ја поттикнат инфлацијата во Обединетото Кралство на над 18% на почетокот на следната година. Ова се највисоките бројки во речиси половина век.
Инвестициската банка „Citi“ предвидува дека инфлацијата на потрошувачките цени во јануари 2023-та година ќе изнесува 18,6%, додека инфлацијата на малопродажните цени ќе достигне 21%, поради исклучително сериозниот пораст на сметките за енергија.
Ограничувањето на сметките за енергија ширум Велика Британија се очекува да се зголеми на 3.717 фунти (4.389 евра) во октомври (за 1.971 фунти од сега повеќе), а потоа да скокне на 4.567 фунти (5.392 евра) во јануари, а потоа на 5.816 фунти (6.867 евра) во април.
„Нашата последна проценка, ажурирана за понатамошниот скок од 25% и 7% на цените на гасот и електричната енергија во Велика Британија минатата недела, укажува на понатамошен пресврт на британската инфлација“, рече главниот економист на банката, Бенџамин Набаро.
„Сега се поставува прашањето што да се направи за да се неутрализира влијанието и врз инфлацијата и врз реалната економија“, додава Набаро.
На почетокот на овој месец, Централната банка на Англија предвиде дека инфлацијата во Обединетото Кралство ќе биде највисока наесен, над 13%.
Цените на гасот на големо продолжија да растат до август, а вчера „Газпром“ објави дека се подготвува да го прекине снабдувањето преку гасоводот „Северен тек 1“ на три дена на крајот на овој месец.
