Американската влада пронашла повеќе од 300 доверливи документи на имотот на поранешниот претседател Доналд Трамп на Флорида, вклучително и материјали од ЦИА, Агенцијата за национална безбедност (НСА) и ФБИ, објави Њујорк Тајмс, цитирајќи повеќе луѓе запознаени со истрагата.
Првичната серија од повеќе од 150 доверливи документи беше пронајдена од Националниот архив на САД во јануари, пишува Њујорк Тајмс.
Соработниците на Трамп му доставија на американското Министерство за правда втор сет документи во јуни, додека третиот сет беше запленет во рација на ФБИ претходно овој месец.
Министерството за правда се уште не одговорило на барање за коментар, ниту пак претставници на поранешниот претседател.
Трамп во понеделникот побара од федералниот суд привремено да го блокира ФБИ во прегледите на материјалот запленет на 8 август од неговиот дом во Мар-а-Лаго додека не биде назначен специјален одбор кој ќе го надгледува прегледот.
Претресот е дел од федералната истрага за тоа дали Трамп незаконски отстранил документи кога ја напушти функцијата во јануари 2021 година по поразот на претседателските избори од демократот Џо Бајден.
За време на претресот во домот на Трамп, ФБИ заплени 11 комплети доверливи материјали, од кои некои беа означени како „строго доверливо“ – највисоко ниво на тајност резервирано за најстрого чуваните информации за националната безбедност на САД и кои може да се прегледуваат само во посебни државни установи.
