Тајванската претседателка Цаи Инг-вен објави дека воената закана за островот што ја претставува Кина „останува висока“, пренесува ТАС С повикувајќи се на локални медиуми.
„Тајван нема да се вклучи во ескалација на конфликтот или да предизвикува спорови, но е цврсто решен да го брани својот суверенитет и национален идентитет, да ги заштити демократијата и слободата“, рече таа.
Тензиите во Тајванскиот теснец и целиот азиско-пацифички регион се зголемија по посетата на претседателката на Претставничкиот дом на САД, Ненси Пелоси на Тајпеј, на 2-3. август, што предизвика остри критики од Кина.
Пекинг постојано го предупредуваше Вашингтон дека ќе возврати ако Пелоси, кој е на третото место во хиерархијата на американската администрација, го посети Тајван.
Кинеската војска потоа започна големи вежби на 4 август, вклучително и лансирање на проектили во шест области околу Тајван, според ТАС С.
Војската во средата објави дека успешно завршила различни воени мисии околу Тајван по речиси една недела, но дека продолжува внимателно да ја следи ситуацијата во Тајванскиот теснец.
Истиот ден, Пекинг ја претстави и својата стратегија за решавање на проблемот со Тајван, преку Белата книга со наслов „Прашањето на Тајван и повторното обединување на Кина во новата ера“, во која рече дека мирното обединување и „една земја, два системи“ се основни принципи за решавање на прашањето со островот кој го смета за своја територија, што властите во Тајпеј вчера ги отфрлија.
Пекинг, исто така, изјави дека „нема да се откаже од употребата на сила“ и дека „ја задржува можноста да ги преземе сите неопходни мерки“ за заштита од надворешно мешање и сите сепаратистички активности на островот.
