И покрај знаците за претстојна рецесија и блокади во Кина поради коронавирусот, потрошувачката на јаглен оваа година се движи кон рекорд во услови на високи цени на природниот гас, објави Меѓународната агенција за енергетика (ИЕА) во својот преглед на пазарот во јули.
Доколку се потврдат проценките на експертите за закрепнување на кинеската економија во втората половина од годината, глобалната потрошувачка на јаглен ќе достигне 8 милијарди тони. Зголемувањето не е толку импресивно, растот е помал од 1% во однос на нивоата во 2021-ва година, но е повеќе од претходниот рекорд регистриран во 2013-та година. Оттогаш, потрошувачката постојано се намалува.
МАЕ предвидува дека во 2023-та година потрошувачката на јаглен ќе биде рекордна. Ова предизвикува загриженост за мерките за заштита на животната средина, бидејќи јагленот е меѓу најзагадувачките извори на енергија.
Во 2021-ва година, потрошувачката на јаглен значително се зголеми, за 6%, по брзото закрепнување на глобалната економија по пандемијата со коронавирусот. Во позадина на очекуваниот раст, јагленот повторно е во пораст во наредните месеци, посочуваат од МАЕ.
Во Европа минатата година потрошувачката на јаглен порасна за 14%, а очекувањата се за продолжување на растот и оваа година, иако веќе поограничени околу 7 проценти, или вкупно до 476 милиони тони. Причината е зголемената побарувачка поради повисоката цена на природниот гас, особено во секторот производство на електрична енергија.
Руската воена инвазија на Украина не дозволи цената на природниот гас да се смири, а тоа ветува континуиран раст на потрошувачката на јаглен. Многу земји во Европа веќе ги откажуваат плановите за затворање на фабриките, иако плановите за постепено укинување на јагленот сè уште се во сила.
Европа сè уште има само околу 5% од вкупната глобална потрошувачка на јаглен.
Најголем потрошувач е Кина со 4,2 милијарди тони во 2021-ва година. Се очекува потрошувачката да остане во ист обем и во 2022-ра година.
Минатата година, Индија, исто така, забележа рекордна потрошувачка на јаглен од нешто повеќе од 1 милијарда тони.
