Иако со месеци се шпекулира за потреси на врвот на Кремљ, првиот човек на Русија, Владимир Путин, никогаш не ги коментираше наводите за промени во кругот на неговите најверни соработници, познати како „силовики“. Неформалната потврда дојде кога лидерот на Русија одржа состанок на Советот за безбедност, на кој забележливо отсуствуваа двајца функционери – министерот за одбрана Сергеј Шојгу и секретарот на споменатата Алијанса Николај Патрушев.
Сергеј Шојгу минатата недела отпатува за Истанбул, каде присуствуваше на церемонијата на потпишување на договорот за извоз на жито и деблокирање на украинските пристаништа. Тој го потпиша договорот, кој веднаш го привлече вниманието на светската јавност.
Имено, покрај необичниот факт што министерот за одбрана потпишува договор за извоз на жито, тогаш во Москва беше организиран настан, чиј редовен посетител е Шојгу. Станува збор за седница на Советот за безбедност, кој го сочинуваат најблиските соработници на Владимир Путин, а тој лично ги избрал. Овојпат отсуствуваа Шојгу и секретарот на тоа тело Николај Патрушев.
Што се однесува до министерот за одбрана, барем се знаеше каде беше за време на седницата, но не и зошто. Сепак, Кремљ се уште не го коментираше статусот на Николај Патрушев, како и зошто секретарот на Советот не бил поканет на седницата.
Наместо двајцата, на состанокот на највисоко ниво на доверливост пристигнаа министерот за надворешни работи Сергеј Лавров, заменик-претседателот на Советот за безбедност Дмитриј Медведев, претседателката на Советот на Федерацијата Валентина Матвиненко и премиерот Михаил Мишустин.
Шојгу на мраз
Министерот за одбрана е „на мраз“ со Путин веќе неколку месеци. Според некои информации, причина е фактот што првиот човек на Кремљ ја изгубил довербата во некои соработници, особено од почетокот на војната во Украина. Еден од нив е Шојгу, член на групата позната во Москва како силовики – во превод, силните.
Во изминатиов период Шојгу помалку се појавуваше во јавноста, што не остана незабележано. Во март, министерот за одбрана „исчезна“ две недели, а за тоа медиумите шпекулираа за што всушност станува збор.
Портпаролот на Кремљ, Дмитриј Песков, тогаш изјави дека министерот за одбрана е фокусиран на тековната „воена операција“, како што Москва ја нарекува војната во Украина.
Сепак, ова објаснување не беше доволно, па се слушнаа бројни теории за локацијата на Шојгу. Некои тврдеа дека е повлечен од јавноста поради кавга со Путин, некои дека сам побегнал во Сибир, а други дека доживеал срцев удар, поради што се опоравува во болница во Санкт Петербург.
Ниту една од овие теории не беше потврдена, а Шојгу набрзо повторно се појави во касарната во близина на Москва. Сепак, една фотографија на која позира со војници не беше доволна да ја убеди светската јавност дека во Кремљ „се е во најдобар ред“. Овојпат на Путин ќе му биде уште потешко да го објасни отсуството на министерот за одбрана на седницата на Советот за безбедност.
Николај Петрушев
Во нешто подобра, но подеднакво неизвесна ситуација е актуелниот секретар на Советот за безбедност, Николај Патрушев – поранешен офицер на КГБ и шеф на руската разузнавачка служба ФСБ.
Путин и Патрушев се запознале во 1970-тите во Санкт Петербург, каде што ја започнале својата разузнавачка кариера. Нивните патишта се вкрстија во следните 50 години, а Патрушев секогаш имаше високи позиции во администрацијата на Путин.
За разлика од Шојгу, тој често јавно ја поддржува војната во Украина и му се заканува на „злобниот“ Запад.
Поради оваа причина, на многумина им беше необично тоа што тој отсуствува од важните состаноци и внатрешните кругови, но набрзо се појави објаснување.
Имено, во Москва токму Патрушев беше оценет како единствениот човек кој може да го замени Путин. Не е тајна дека тој со децении е еден од неговите главни советници и луѓе кои го обликуваат мислењето на првиот човек на Кремљ.
Сега се чини дека Патрушев веќе не сака да обликува од сенка, туку отворено да владее.
Иако Патрушев никогаш не зборуваше за своите намери и планови, самите гласини за човек кој, според елитата, има капацитет да го преземе кормилото, не наиде на позитивни реакции кај повеќедеценискиот претседател Путин.
Во исто време, секретарот на Советот за безбедност го презеде водството во одбраната на руската енклава Калининград, заканувајќи се со „сериозна“ одмазда за блокирањето на транзитот низ Литванија поради санкциите наметнати од Европската унија.
Со оглед на зголеменото присуство на Патрушев во јавноста, како и улогите што ги презема, јасно е дека Путин нема да биде среќен што постои мислење дека тој е замнлив.
