Данската биотехнолошка компанија Bavarian Nordic (BN) во понеделникот соопшти дека Европската комисија дозволила нејзината вакцина Imvanex да се стави во продажба за заштита од мајмунски сипаници, како што препорача Европската агенција за лекови (ЕМА) минатата недела.
Ден претходно, Светската здравствена организација (СЗО) издаде сериозно предупредување, прогласувајќи го брзото ширење на мајмунските сипаници за глобална здравствена вонредна состојба.
„Достапноста на која било одобрена вакцина може значително да ја зајакне подготвеноста на државите во борбата против новите болести, но само преку инвестиции и структурно планирање на биолошката подготвеност“, рече извршниот директор на BN, Пол Чаплин.
Вакцината на BN е вакцина против сипаници која во петокот беше одобрена од Европската агенција за лекови (ЕМА) како вакцина за превенција од мајмунски сипаници, откако тоа веќе го направија САД и Канада.
Данската компанија претходно испорача на неколку земји од ЕУ од оваа вакцина, тогаш неодобрена, веднаш по избувнувањето на мајмунските сипаници.
Освен за ЕУ, одобрението за Imvanex важи и за Исланд, Лихтенштајн и Норвешка.
Во последните три месеци цената на акциите на компанијата Bavarian Nordic е зголемена за 122 отсто, токму поради големата побарувачка на вакцината против мајмунски сипаници.
СЗО во саботата истакна дека во моментов се работи за епидемија која се проширила главно меѓу мажите кои имаат секс со мажи, особено оние кои имаат тенденција да имаат повеќе сексуални партнери.
Ова значи, рече шефот на СЗО, Тедрос Аданом Гебрејесус, дека ова е епидемија што може да се запре со примена на „вистинската стратегија во одредени групи“.
Мајмунските сипаници се карактеризираат со рани на кожата кои можат да се појават на гениталиите или на устата. Болеста е придружена со треска, болки во грлото и болки во лимфните јазли и осип кој наликува на осип што се јавува кај сипаници.
Болеста обично поминува сама по себе, но може да биде многу болна.
Се смета дека вакцинацијата против сипаници обезбедува цврста заштита од мајмунски сипаници, но не е познато колку долго трае заштитата по вакцинацијата.
Досега вакцината Imvanex беше одобрена во Европската Унија за превенција од инфекција со сипаници кај возрасни. Содржи жива модифицирана форма на вирусот наречена „Анкара вакцинија“, која е поврзана со вирусот на сипаници.
Во јуни, Комитетот за лекови за хумана употреба (CHMP) на Европската агенција за лекови (EMA) започна со евалуација на податоците за проширување на индикацијата на вакцината Imvanex за нејзина употреба за заштита од мајмунски сипаници.
