Компактниот „Nissan Leaf“ беше еден од пионерите меѓу електричните автомобили, а го следеа и голем број модели со нулта емисија. Електричниот хечбек беше претставен во 2010-та година и досега е продаден во речиси 580.000 примероци.
Меѓутоа, како што напредуваше технологијата, овој модел стана застарен и продажбата почна да опаѓа, особено откако сопствениците открија проблем со распаѓање на батеријата. И тоа очигледно се покажа како клучно за одлуката на „Nissan“, каде што планираат да го напуштат „Leaf“ без да понудат наследник.
Според „Automotive News“, на „Leaf“ му преостануваат „неколку години“ (неодреден) живот, а потоа „Nissan“ не планира нова генерација на моделот. Така, името „Leaf“ ќе влезе во историјата, што, барем според некои експерти, е огромна грешка на јапонскиот производител, бидејќи токму ова име ги направи лесно препознатливи електричните автомобили на „Nissan“.
Сепак, компанијата цврсто има намера да се обложи на кросовери, кои ќе играат голема улога во електричната стратегија на „Nissan“ во наредните години. Затоа, на врвот на гамата на брендот ќе се најде кросоверот „Ariya“, кој „Nissan“ агресивно го рекламира во последно време. Сепак, овој модел имаше и проблеми со производството поради недостаток на микрочипови, што ги натера американските дилери на марката да престанат да примаат нарачки.
