Коосновачот на Мајкрософт, Бил Гејтс, донираше 20 милијарди долари на добротворната фондација што ја води со поранешната сопруга Мелинда Френч Гејтс за да ги зголеми годишните исплати.
Донацијата ќе и помогне на Фондацијата Бил и Мелинда Гејтс – една од најголемите приватни добротворни фондации во светот – да го зголеми годишното донирање за 50 отсто на 9 милијарди долари до 2026 година, напиша тој на својот блог во средата.
Големите кризи на нашето време бараат од сите нас да направиме повеќе, напиша Гејтс, мислејќи на пандемијата Ковид-19, војната во Украина и климатските промени, меѓу другото.
Тој додаде дека сложените последици од кризите, кои вклучуваат зголемување на инфлацијата, ја зголемија потребата за поголеми инвестиции во областите на главниот фокус на Фондацијата, како што се здравството, образованието, родовата еднаквост и намалувањето на сиромаштијата.
Со ова, донацијата на организацијата се зголемила на околу 70 милијарди долари, што вклучува и донација од 3,1 милијарди долари од Ворен Бафет минатиот месец.
