Руското Министерство за надворешни работи ги обвини САД дека стојат зад забраната на Литванија за премин на стоки од Русија во нејзината ексклава, регионот Калининград, што ги зголеми тензиите меѓу Москва и Западот.
– Таканаречениот „колективен запад“, со експлицитни инструкции од Белата куќа, воведе забрана за железнички транзит на широк спектар на стоки низ провинцијата Калининград, се вели во соопштението на руското Министерство за надворешни работи објавено во петокот.
Се вели дека овој потег е дел од моделот на „растечки непријателства од страна на САД“ против Русија.
Литванија, членка на Европската унија, минатата сабота почна да го блокира транзитот на руска стока на листата на санкции на ЕУ, откако стапија на сила новите ограничувања.
Москва остро го критикуваше потегот, нарекувајќи го „блокада“ и вети строг одговор. Вилнус соопшти дека е подготвен во случај Русија да ја исклучи Литванија од регионалната енергетска мрежа.
Руските власти проценија дека забраната ќе запре меѓу 30 и 50 отсто од стоковниот сообраќај, но тие исто така рекоа дека стоката може брзо да се пренасочи кон бродовите што минуваат низ Балтичкото Море.
Литванската премиерка Ингрида Симоните во средата рече дека тврдењата на Русија за блокадата се неточни.
Таа додаде дека патничкиот сообраќај продолжува непречено и дека стоката опфатена со забраната сочинува само 1 процент од вкупниот руски товарен транзит до Калининград.
Москва, исто така, во петокот рече дека одбивањето на Вашингтон да ја укине забраната за летови за да може руски авион да лета во САД и да ги превезе руските дипломати покажува дека повиците на САД за продолжување на дијалогот не биле искрени.
Со оглед на влошените односи, Русија рече дека е „невозможно“ да се одржат разговори на експертско ниво со Вашингтон за голем број билатерални прашања што требаше да се одржат во блиска иднина.
Таа не прецизираше точно за кои прашања се споменува ниту кога требало да се случат тие разговори.
