Бројот на луѓе принудени да ги напуштат своите домови се зголемува секоја година во изминатата деценија и сега достигна највисоко ниво од почетокот на водење евиденција за глобалното раселување, објави денеска Агенцијата за бегалци на ОН (УНХЦР).
Бројот на раселени лица поради војни, насилство, прогон и кршење на човековите права достигна 89,3 милиони на крајот на 2021 година, што е зголемување од осум отсто во однос на претходната година и повеќе од двојно повеќе од 42,7 милиони раселени луѓе во 2012 година, се вели во годишниот извештај “Глобалните трендови” на УНХЦР.
Оттогаш, руската инвазија на Украина, која доведе до најбрзата и една од најголемите кризи со принудно раселување од Втората светска војна, како и други кризи од Африка до Авганистан и пошироко, ја донесе оваа бројка на драматична пресвртница од 100 милиони. луѓе, велат од УНХЦР.
„Бројот расте секоја година во изминатата деценија. Или меѓународната заедница заеднички ќе преземе чекори за да се запре оваа човечка трагедија, да се решат конфликтите и да се најдат долгорочни решенија, или овој ужасен тренд ќе продолжи“, рече високиот комесар на ОН за бегалци Филипо Гранди.
Минатата година беше одбележана со ескалација на постоечките и избивање на нови конфликти, а според Светска банка, 23 земји, со вкупно 850 милиони жители, се соочиле со конфликти со среден или висок интензитет.
Во меѓувреме, недостигот на храна, инфлацијата и кризата предизвикана од климатските промени донесоа нови потешкотии кај населението, го намалија капацитетот за обезбедување хуманитарна помош во време кога изгледите за нејзино финансирање во многу кризи се слаби, според УНХЦР.
