Биткоинот денеска накратко падна во азиското тргување под 21.000 долари, бидејќи продолжи паничната распродажба на криптовалутите, но подоцна малку закрепна за време на трговската сесија и се движеше околу нивото од 21.800 долари.
Најголемата криптовалута во светот падна за речиси 14 проценти во последните 24 часа, додека итириумот ослабе за повеќе од 12 проценти во истиот период, според Коинбејс, пренесува CNBC.
Во моментов сè пука, било да се тоа акции, крипто средства или било што друго. Она што го гледате на пазарот е страв, несигурност и сомнеж, вели Нирмал Ранга, шеф за тргување и техничка анализа во крипто берзата ZebPay.
Силен нокаут на крипто-средствата во понеделникот следеше кога трговските платформи како што се Целзиус и Бајнс ги прекинаа повлекувањата, а некои компании дури и го затворија својот бизнис.
Целзиус рече дека повлекувањата, замените и трансферите меѓу сметките ќе бидат суспендирани поради „екстремните пазарни услови“ и дека овој потег треба да ги стабилизира ликвидноста и бизнисот.
Во меѓувреме, Бајнанс, најголемата берза за криптовалути во светот, го блокираше повлекувањето на биткоини повеќе од три часа поради метеж на трансакциите, што предизвика акумулација на налози и стагнација.
Пазарната капитализација на криптовалутите падна под 1,0 трилиони долари во понеделникот, за прв пат од февруари 2021 година, покажаа податоците од платформата CoinMarketKap. Во последните денови од пазарот се избришани околу 200 милијарди долари.
Распродажбата на криптовалутите дојде бидејќи инвеститорите главно бегаат од ризичните средства поради страв од потенцијална глобална рецесија, додека водечките централни банки ширум светот ги зголемуваат каматните стапки за да ја скротат инфлацијата.
Биткоинот падна за речиси 70 отсто од историскиот рекорд што го постигна во ноември 2021 година.
