Загрижени за војната во Украина и рекордната инфлација, европските потрошувачи најверојатно ќе се разделат со нивната улога како клучни двигатели во постпандемиското закрепнување на регионот, што ќе ја погоди економијата во текот на оваа година.
Врз основа на влошената доверба на потрошувачите, економистите предводени од Ана Боата проценуваат дека изгубената приватна потрошувачка во 19-те земји-членки на еврозоната во 2022-ра година ќе изнесува 70 милијарди евра, што е еквивалентно на околу 500 евра по домаќинство. Проценките се засноваат на анкета во мај на повеќе од 2.500 луѓе во Германија, Франција и Италија, трите најголеми економии во регионот.
Приватната потрошувачка во еврозоната почна да се намалува на крајот на минатата година и падна за 0,7% во првиот квартал во услови на постојан силен ценовен притисок, кој може да продолжи да се влошува. Европската централна банка оваа недела предупреди дека инфлацијата во 2022-ра година би можела да надмине 7 отсто и е посветена на зголемување на каматните стапки за четвртина поен во следниот месец, прво во повеќе од десет години. Поголем пораст веројатно ќе следи наесен.
Боата и нејзините колеги очекуваат потрошувачките трошоци да се намалат во вториот и четвртиот квартал, прекинат со краток пораст на трошоците за хотели и патувања за време на сезоната на летни одмори.
Во исто време, нивоата на бруто заштеди во трите испитани економии ќе паднат на долгорочниот просек пред пандемијата до крајот на годината, предвидуваат економистите.
Поголемите трошоци за храна и енергија се делумно виновни за тоа. Сметките за домаќинствата за првите месеци од годинава ќе пораснат во просек за 550 евра, додека за вторите ќе се зголемат за повеќе од 750 евра, се вели во извештајот.
Иако вишокот на заштеди во еврозоната изнесува повеќе од 380 милијарди евра, тој е нерамномерно распределен меѓу различни групи на население, поделен според нивните приходи, пишуваат економистите и додаваат дека најслабите домаќинства имаат тампон од 93 евра.
„Затоа, за речиси две третини од домаќинствата вишокот на заштеди ќе биде недоволен да ги заштити од инфлацискиот ураган годинава“, заклучуваат тие.
