Економијата на Обединетото Кралство оваа година ќе расте побавно од очекуваното, а следната година ќе стагнира, се вели во прогнозата на ОЕЦД. Организацијата за економска соработка и развој очекува дека економијата на Велика Британија годинава ќе зајакне за 3,6 отсто, додека следната година ќе остане на нула.
Тоа значи дека Велика Британија ќе го премине патот од втората најбрзо растечка економија во групата на најразвиени индустриски земји, Г7, до онаа со најбавен раст во 2023-та година, јавува „ВВС“.
Според аналитичарите, британската економија е тешко погодена од комбинација на фактори, вклучувајќи повисоки каматни стапки, повисоки даноци, намалена трговија и поскапа енергија и храна.
Се очекува инфлацијата да продолжи да расте над 10 отсто до крајот на оваа година, пред постепено да падне на 4,7 отсто до крајот на 2023-та година. Извештајот не ги вклучи итни мерки од 26-ти мај, кои вклучуваат попуст од 400 фунти на сметките за енергија за сите домаќинства во земјата.
Министерството за финансии најави дека прогнозите ќе загрижат многумина, но дека британската економија е доволно силна да се справи со предизвиците.
„Иако не можеме целосно да ја изолираме земјата од глобалните притисоци, имаме план за раст“, соопшти Министерството, додавајќи дека тоа им помага на граѓаните полесно да се справат со зголемените животни трошоци.
Опозициската лабуристичка влада во сенка оцени дека извештајот на ОЕЦД „ги разоткри екстремните предизвици“ со кои се соочува британската економија.
„Фактот дека економскиот раст во Велика Британија ќе запре следната година, а само Русија има полоши резултати од нас во Г-20, е срамно обвинување за хаос и некохерентност на оваа конзервативна влада“, велат лабуристите.
