Две недели откако беше претставен „Range Rover Evoque“ врз кој беа извршени мали промени за да се одржат добрите продажни резултати, на ред дојде и најстариот модел во понудата на британската куќа, „Land Rover Discovery“.
Редизајнираниот Land Rover Discovery
Веќе на прв поглед може да се забележат новите предни светла со интегрирани дневни светла, новата решетка на ладилникот и предниот браник, кои сега се во духот на најексклузивниот модел во понудата, „Range Rover“. Новина се и тркалата кои се со модерен дизајн и пакетот „Black Design“ кој вклучува затемнети стакла и детали на надворешноста во сјајно црна боја.
Погонските единици не претрпеа големи промени, освен оптимизираниот „SDV6“ 3-литарски дизел мотор кој доби „ZF“ 8-степена трансмисија, па емисијата на „CO2“ падна од 230 грама на 213 грама по километар. Малку подобрена е и потрошувачката на гориво, па сега изнесува 8 литри на 100 km во комбинирано возење. Овие резултати можеби не делуваат спектакуларно, но треба да се има во предвид дека „Discovery“ тежи дури 2570 kg. Со 256 KS и 600 Nm моторот „SDV6“ е во состојба да го забрза возилото до „стотка“ за околу 9 секунди и да ја оствари максималната брзина од 180 km/h.