„Salesforce“ ја зголеми својата прогноза за приспособена годишна заработка и рече дека нема финансиско влијание од неизвесното економско опкружување. Тоа ја доведе цената на акциите на производителот на софтвер за претпријатијата да се зголеми за 8% за време на тргувањето по работното време.
Гигантот рече дека забележал голема побарувачка за неговиот софтвер од компании кои сакаат да ја подобрат ефикасноста и да донесат модерни работни текови во нивните процеси, вклучително и хибридни операции, и покрај високата инфлација и намалената побарувачка на потрошувачите.
Акциите на компанијата со седиште во Сан Франциско пораснаа за 7,7 отсто на 172,50 долари, откако потонаа за 37 отсто во оваа година, бидејќи инвеститорите се повлекоа од растечките компании по серијата лоши вести, вклучително високата инфлација во САД и кризата во Украина.
Акциите на конкурентите „Oracle“ и „Microsoft“, кои исто така дадоа добри прогнози за годината, паднаа меѓу 18 и 19% во оваа година.
„Макроекономските или геополитичките предизвици може да се појават порано или подоцна, но „Salesforce“ е добро позициониран да капитализира од корпоративните трошоци за дигитална трансформација, а компанијата има особено отпорен модел“, рече аналитичарот на „SMBC Nikko Securities“, Стивен Коениг.
„Salesforce“ ја зголеми својата приспособена прогноза за заработка за фискалната година која завршува во јануари 2023-та година на 4,75 долари по акција, што е повеќе од претходно очекуваните 4,63 долари по акција.
„Ова зголемување е одлична вест, бидејќи е клучен показател што го следат инвеститорите, особено во сегашните пазарни услови“, рече аналитичарот на „William Blair & Company“, Арџун Батија.
Сепак, девизните предизвици ја принудија компанијата да ја минимизира својата прогноза за приходи, која очекува да биде помеѓу 31,8 милијарди долари и 31,7 милијарди долари. Претходната прогноза беше од 32 до 32,1 милијарди долари.
Приходите за првиот квартал што заврши на 30-ти април се зголемија за 24 отсто на 7,41 милијарди долари во однос на претходната година. Тоа е над проценката на аналитичарите од 7,38 милијарди долари, според „Refinitiv“.
Нето приходот падна на 28 милиони долари од 469 милиони долари.
