Во март, извозот на нафта и донесе на Саудиска Арабија 30 милијарди долари – најголем приход во последните шест години, пишува „Bloomberg“. Овој приход е поддржан од растот на цената на нафтата на пазарите и зголеменото производство.
Тоа значи дека во март Саудиска Арабија добивала околу 1 милијарда долари дневно од продажба на нафта или зголемување од 123% на годишно ниво. Петте најважни купувачи на саудиската нафта се и најголемите увозници – Кина, Индија, Јапонија, Јужна Кореја и САД, покажуваат статистичките податоци.
Во март земјата го зголеми производството на 10,3 милиони барели дневно, а просечната цена на Брент тогаш беше 112 долари за барел. Цената на нафтата скокна за околу 50% на годишно ниво, а главен фактор беше руската воена инвазија на Украина. Пред тоа, цената на суровините почна да расте во услови на закрепнување на глобалната економија од коронавирусот.
Благодарение на скапата нафта, Саудиска Арабија успеа да забележи буџетски суфицит од 57,5 милијарди риали (15 милијарди долари) во првите три месеци од годината. Според Меѓународниот монетарен фонд (ММФ), оваа година земјата ќе биде една од најбрзо растечките економии.
Се очекува продажбата на нафта да продолжи да расте, пишува „Bloomberg“. Агенцијата потсетува дека ОПЕК +, организацијата која обедини 23 нафтени земји, меѓу кои и Русија, не се откажува од договорот за постепено зголемување на производството до септември.
Земјите како САД и Јапонија веќе го повикаа картелот побрзо да го зголеми производството за да ги смири пазарите на нафта и да ги намали цените.
