Цената на гасот во Европа повторно расте во очекување на претстојните плаќања кон „Газпром“, пишува „Bloomberg“. Јунските договори на холандската берза „ТТF“ во утринската сесија се тргуваа за речиси 96 евра за мегават-час, што претставува пораст од околу 2%.
Досега ЕК им даде неколку насоки на земјите од ЕУ во однос на шемата што ја нуди „Газпром“ за плаќање на природниот гас во рубљи. Според нив, прифатливи се плаќањата во евра или долари, како што е предвидено во договорот. Брисел, исто така, не забранува отворање на сметка во странска валута (долари или евра) во „Газпромбанк“, но следниот чекор – отворање сметка во рубљи, е „надвор од насоката на ЕК“.
Во оваа фаза, неколку европски компании, меѓу кои италијанската „Eni“ и германската „Uniper“, велат дека се надеваат дека ќе продолжат да купуваат руски природен гас. Според пишувањата на медиумите, европските компании веќе отвориле сметки во рубљи кај „Газпромбанк“. Според портпаролот на ЕК, националните власти мора да го следат прекршувањето на режимот на санкции. На Ерик Мамер му беше тешко да каже каква ќе биде казната за ваквите постапки на компаниите.
Минатата недела италијанскиот премиер Марио Драги коментираше дека нема писмени инструкции од Европската комисија за исплатите во рубљи и дека никој не рекол дека плаќањата во рубљи се кршење на режимот на санкции. Портпаролот на „Eni“ пред еден ден одби да ги коментира планираните плаќања, но потврди дека компанијата не ја започнала процедурата за отворање сметки во „Газпромбанк“.
Компанијата мора да плати за гасот на „Газпром“ до 20-ти мај.
На денешен ден истекува рокот за плаќање за Словачка. Вицепремиерот и министер за економија на земјата Ричард Сулик коментираше за локалните медиуми дека Словачка ќе го плаќа гасот во евра, како што е договорено во договорот со „Газпромбанк“.
„Немаме никаква врска со вториот дел од операцијата“, рече тој, цитиран од ТАСС.
Сулик забележува дека руската банка мора самата да ја заврши конверзијата и да ја пренесе на сметките на „Газпром“ во рубљи. Засега не е јасно дали компанијата ќе ја прифати оваа исплата.
На 27-ми април, „Газпром“ го прекина гасот за Бугарија и Полска, откако двете земји одбија да платат во рубљи според предложената шема.
