Паничната распродажба на крипто-пазарите продолжува, а вредноста на биткоинот падна под 27.000 долари.
Најголемата криптовалута во светот потона за 2,42% на 28.716,15 долари – на тргувањето синоќа до 23:44 часот по источно време, според Coin Metrics. Етерот падна за 4,93 отсто на 2021,95 долари, објави CNBC.
Остриот пад на криптовалутите и акциите дојде откако американското биро за статистика на труд објави дека инфлацијата во САД пораснала за 8,3 отсто на годишно ниво, нешто повеќе од прогнозите на економистите анкетирани од Дау Џонс.
Тие информации ги загрижија инвеститорите и ги наведоа да се „извлечат“ од ризичните средства, вклучително и криптовалутите. Цените на криптовалутите продолжуваат да се движат во силна корелација со индексот S&P 500 и од неодамна со Nasdaq Composite.
Денеска, нешто по 8 часот наутро според наше време, најпопуларната дигитална монета вредеше точно 26.880 долари.
Пазарот на криптовалути веќе некое време е под притисок. ФЕД останува на зголемување на каматните стапки, што, генерално, предизвика голем страв на пазарот, па падот на акциите и крипто средствата продолжува – вели Мајкл Ринко, соработник во брокерската куќа AscendEx.
Ова е втор пат оваа недела биткоинот да падне на ниво од околу 29.000 долари. Аналитичарите велат дека нивото од 30.000 долари е психолошкиот праг за најголемата криптовалута по пазарна капитализација и може да потоне уште подлабоко доколку се лизне под таа граница.
