Годишната инфлација во Турција во април достигна ново највисоко ниво во последните 20 години, на 69,97%, објави „Reuters“. Војната во Украина и зголемената цена на енергенсите и суровините беа движечката сила зад брзиот пораст на цените.
На месечна основа, потрошувачките цени се зголемени за 7,25 отсто, покажуваат податоците на турскиот национален статистички институт. За споредба – прогнозите од медиумска анкета беа за раст од 6% во април, додека очекувањата за годишно ниво беа за резултат од 68%.
Зголемувањето на потрошувачките цени е предизвикано од растот од 105,9% во транспортниот сектор кој вклучува поскапи извори на енергија и растот од 89,1% кај цените на храната и безалкохолните пијалаци.
На месечно ниво најмногу поскапеле храната и безалкохолните пијалоци за 13,38%, а станбените објекти пораснале за 7,43%.
Во меѓувреме, производствената инфлација се зголеми од 115% во март на 121,8% во април 2022-ра година, нов максимум од март 1995-та година во услови на зголемени цени на енергенсите, прекини во снабдувањето и послабата лира. Цените растат насекаде: во рударството и вадењето камен (125,9%), во преработувачката индустрија (112,1%), во електричната енергија, гасот и климатизацијата (247,5%) и во водоснабдувањето (63,2%). Во однос на претходниот месец, продажните цени се зголемени за 7,7%.
По објавувањето на податоците, турската лира падна за 0,9%, при што еден американски долар се менува за 14,8525 турски лири.
Ценовните притисоци ги оптоваруваат домаќинствата само една година пред претстојните претседателски и парламентарни избори во Турција, кои би можеле да стават крај на долгогодишното владеење на актуелниот турски претседател Реџеп Таип Ердоган.
„Се работи за зголемувањето на цените на храната и енергијата, како и за неверојатниот неуспех на монетарната политика во Турција – се работи за мизерниот и апсолутен неуспех на неконвенционалната монетарна политика на Ердоган“, рече Тимоти Еш, стратег во „Bluebay Asset Management“.
Претседателските избори, како и оние за нов парламент во Турција, ќе се одржат во јуни 2023-та година, а анкетите покажуваат дека поддршката за Ердоган опаѓа.