Макрон го повтори своето барање до Путин: Русија мора да ја прекине агресијата

Елисејската палата објави соопштение во кое се наведува дека францускиот лидер Емануел Макрон, во разговор со неговиот руски колега Владимир Путин, уште еднаш ја подвлече „екстремната тежина на последиците од руската агресивна војна против Украина“ и го обнови своето барање за прекин на огнот.

Макрон изразил загриженост и за ситуацијата во Донбас и Мариупол и ја повикал Русија да дозволи продолжување на евакуацијата од фабриката Азовстал, соопшти кабинетот на францускиот претседател, пренесе Би-би-си.

Тој ја повика Русија „да ги исполни своите обврски како постојана членка на Советот за безбедност со ставање крај на оваа разорна агресија“, се вели во соопштението.

Макрон се соочи со одредени критики за неговите напори да одржи отворен дијалог со Кремљ, водење на повеќечасовни телефонски разговори со Владимир Путин од почетокот на инвазијата.

Францускиот претседател разговараше со украинскиот претседател Володимир Зеленски во текот на викендот.