Украина би можела да изгуби десетици милиони тони жито поради руската блокада на нејзините пристаништа во Црното Море, а тоа ќе предизвика криза со храна која ќе ги погоди Европа, Азија и Африка, изјави претседателот Володимир Зеленски.
„Русија не дозволува бродови да влегуваат и излегуваат, таа го контролира Црното Море. Русија сака целосно да ја блокира економијата на нашата земја“, изјави Зеленски за австралиската информативна програма „60 Minutes“.
Украина е главен извозник на жито и други прехранбени производи, како и метали.
Според германскиот министер за земјоделство Џем Јоздемир, руските напади врз инфраструктурата за жито во земјата се чини дека се обид да се намали конкуренцијата на руските извозни пазари.
„Редовно добиваме информации за целни руски напади врз силоси за жито, складишта за ѓубрива, земјоделско земјиште и инфраструктура“, изјави Јоздемир за „Redaktionsnetzwerk Deutschland“.
Од страна на Русија беше негирано дека нападнала цивилни области.
Според министерот, се зголемуваат сомнежите дека рускиот претседател Владимир Путин сака „да ја елиминира Украина како конкурент на долг рок“.
Русија и Украина обично се главни конкуренти на глобалниот пазар на жито. Светските цени на пченицата пораснаа за околу 40 отсто од почетокот на руската инвазија на Украина на 24-ти февруари, која го прекина снабдувањето на другите пазари преку Црното Море.
Според Меѓународниот совет за житарки, Украина беше четвртиот најголем извозник на жито во светот во сезоната 2020/21, продавајќи 44,7 милиони тони во странство. Извозот нагло опадна по руската инвазија.
„Со оглед на зголемениот глад во светот, Русија се стреми да го зголеми притисокот. Истовремено, огромното зголемување на пазарните цени е добро за Русија бидејќи носи нови пари во земјата“, рече Јоздемир.
Јоздемир рече дека ќе го постави прашањето како може да се поддржи Украина за да го зголеми извозот на жито за време на состанокот на министрите за земјоделство на Г-7 во средината на мај.
„Треба да бараме алтернативни транспортни методи. Железничкиот транспорт може да биде метод за извоз на повеќе жито, иако ќе бара поголем напор и ограничен капацитет. Германија ќе се обиде да помогне“, додаде министерот.
Украина постепено го проширува извозот на жито, користејќи копнен транспорт до Европската унија. Но, различните широчини на пругите во Украина и ЕУ значат дека украинските возови не можат автоматски да сообраќаат на европската железничка мрежа.
