Командантот на украинската 36-та поморска бригада, Сергеј Волин, кој е опколен во фабриката Азовстал во Мариупол, се обратил за помош кај турскиот претседател Реџеп Таип Ердоган, а снимката од неговиот апел ја објави телевизијата Хабертурк, пренесува „Украинска правда“.
-Почитуван претседателе Реџеп Таип Ердоган! Ви се обраќа мајорот на маринскиот корпус Сергеј Волин. Јас сум со припадниците на 36-та поморска бригада, која се наоѓа во гарнизонот во Мариупол и која 65 дена се бори во областа – рече Волин во директно обраќање до турскиот претседател.
Командантот на маринците тврди дека повеќе од 600 војници и цивили биле под опсада.
-Имаме 600 војници кои имаат рани од различен степен и на кои им е потребна помош. Со нас имаме цивили кои се повредени и на кои исто така им е потребна вашата помош. Стотици цивили и десетици деца се со нас во објектот. Најмалиот има четири месеци, додаде мајорот.
Волин побара помош од Ердоган.
-Сега го молам турскиот народ, почитуван господине претседателе, да ја примени процедурата за евакуација, да направи се за да го однесе гарнизонот во Турција и практично да не изнесе од Азовстал со безбедносни гаранции од турска страна. Сметаме на вашата помош, рече командантот на маринците.
Да потсетиме, индустриската зона Азовстал и фабриката за челик во Мариупол се под целосна контрола на руските сили. Денеска 25 лица, меѓу кои шест деца, наводно го напуштиле комплексот на челичарницата.