Во понеделникот, украинскиот претседател Володимир Зеленски официјално му го предаде пополнетиот прашалник за пристапот на Украина во ЕУ на претставникот на ЕУ и рече дека верува оти потегот ќе доведе до тоа неговата земја да добие кандидатски статус во наредните недели.
Прашалникот, кој служи како почетна точка на ЕУ за да ги започне пристапните преговори, претседателката на Европската комисија Урсула фон дер Лајен му го предаде на украинскиот претседател за време на посетата на Киев на 8 април.
Украина поднесе барање за членство во Европската унија по почетокот на руската инвазија на 24 февруари.
Процесот на пристапување во Европската унија е сложен и одзема многу време, па дури и ако Комисијата позитивно ја оцени подготвеноста на земјата-кандидат, може да поминат години пред вистинското отворање на преговорите.
Фон дер Лејен му вети на украинскиот претседател дека ќе се забрзаат првите чекори на Украина кон членството во ЕУ, велејќи дека „нема да биде прашање на години како и обично, но таа смета дека ќе бидат прашање на недели“.
Зеленски му го предал пополнетиот документ на претставникот на ЕУ во Украина, се вели во снимката од средбата објавена од неговата влада.
„Цврсто веруваме дека овој процес (додавање кандидатски статус) ќе се случи во наредните недели и ќе биде позитивен за историјата на нашиот народ, со оглед на цената што ја плати на патот кон независноста и демократијата“, рече Зеленски на средбата.
Заменик-шефот на кабинетот на украинскиот претседател претходно во понеделникот изјави дека очекува Украина да добие кандидатски статус во јуни на состанокот на Европскиот совет, на кој се собрани лидерите на земјите-членки на ЕУ.
