52. ден војна во Украина: Експлозии во Киев и Лавов, Зеленски го објави бројот на загинати војници

Руската инвазија на Украина влезе во 52. ден. Украинскиот претседател Володимир Зеленски во интервју за Си-Ен-Ен изјави дека во седумнеделната руска инвазија на Украина, загинале 2,5-3 илјади украински војници, а десетици илјади се повредени. Гувернерот на областа Миколајев во петокот доцна навечер изјави дека пет лица загинале во гранатирањето на Миколајев, а Ројтерс не успеал да ја потврди информацијата. Во меѓувреме, Обединетото Кралство рече дека оштетувањето на транспортната инфраструктура на Украина како резултат на руските напади е „значаен предизвик“ за секој што се обидува да достави хуманитарна помош во северна Украина.

Експлозии во Киев и Лавов

Експлозии одекнаа рано утринава во главниот град на Украина Киев и Лавов, во западна Украина, јавија локалните медиуми.

Непосредно пред експлозијата во Киев беше најавен воздушен напад.

Се уште не е познато што експлодирало.

Најжестоките борби се водат во опколениот пристанишен град Мариупол во областа Доњецк.

Руското Министерство за одбрана соопшти дека ја окупирало градската фабрика за челик Илич, што Ројтерс не може да го потврди.

Се верува дека украинските бранители најчесто се стационирани во Азовстал, друга огромна фабрика за челик. И двете фабрики се во сопственост на Метинвест, компанијата на најбогатиот Украинец.