Руската амбасада во Вашингтон ги отфрли обвинувањата за употреба на хемиско оружје како „неосновани“, пренесува Тас.
„Претпаролот на Стејт департментот вчера зборуваше за можноста нашата земја да употреби хемиско оружје во светло на наводните неуспеси на специјалната воена операција во Украина. Нед Прајс повторно се истакна со празни реченици, кои не ги поткрепи со никакви докази“, соопштија од руската амбасада.
Руските дипломати тврдат дека „руските вооружени сили немаат и не можат да располагаат со никакво хемиско оружје, бидејќи Русија ги елиминираше сите свои залихи на хемиско оружје во 2017 година“.
„Информациите потврдени од руското Министерство за одбрана за украинските радикали кои подготвуваат провокации со употреба на хемикалии се вознемирувачки. Имаме прашања и за потеклото на овие супстанции“, соопшти руската амбасада, барајќи од САД „да престанат да шират дезинформации“.
Киев: Русите планираат офанзива на Азовстал
Украинската армија објави дека руските сили продолжиле да го бомбардираат Мариупол и дека планираат офанзива во близина на фабриката за челик Азовстал, каде што логорувале преостанатите украински сили.
Зеленски: Бајден е вистински лидер
Украинскиот претседател Володимир Зеленски го пофали својот американски колега кој руската операција во Украина ја нарече „геноцид“.
„Вистинските зборови на вистинскиот лидер. Нарекувањето на работите со нивното име е клучно за да се спротивставиме на злото. Благодарни сме за помошта што ја добивме досега од Соединетите држави, но итно ни треба повеќе оружје за да спречиме понатамошни руски злосторства“, Зеленски кажа.
Бајден: Да, јас го нареков геноцид
Американскиот претседател Џо Бајден тврди дека руските сили извршиле геноцид во Украина.
„Да, го нареков геноцид затоа што станува се појасно и појасно дека Путин се обидува да ја избрише идејата дека воопшто е можно да се биде Украинец. Има се повеќе докази“, изјави Бајден пред американските новинари.
„Нека решат адвокатите дали тоа е вистинската квалификација, но мене секако ми изгледа како геноцид“, додаде Бајден.
