На Телеграм профилот на Зеленски е објавена фотографија од шефот на политичкиот совет на партијата “Опозициска платформа – за живот” на Виктор Медведчук, со лисици.
И тоа откако, како што се наведува, бил уапсен во специјална операција на Украинската служба за безбедност (СБУ).
„Специјалната операција е изведена благодарение на СБУ. Браво! Детали подоцна“, се вели во пораката, заедно со објавената фотографија на Медведчук како седи со лисици во маскирна униформа.
За притворот на Медведчук повторно проговори и претседателот на СБУ Иван Баканов.
Тој им се заблагодари на сите претставници на СБУ, вклучително и контраразузнавањето и истражителите, кои „по инструкции на украинскиот претседател Володимир Зеленски, ја докажаа својата професионалност и ја спроведоа оваа молскавична и опасна повеќестепена специјална операција за апсење на пратеникот Медведчук“.
„Ниту еден предавник нема да ја избегне казната и ќе одговара според законот на Украина. За сета тежина, за сите злосторства на денешницата, кои доведоа до неговите лични постапки“, рече тој.
За веста за апсењето зборуваше и портпаролот на Кремљ Димитриј Песков.
Тој нагласи дека фотографијата треба да се провери.
„Фотографијата со наводното апсење на Медведчук треба да се провери поради голем број професионални и непрофесионални фалсификати во Украина, вклучително и со помош на меѓународните ПР-агенции“, коментира Песков.
Претходно, Државното истражно биро (СБИ) на Украина соопшти дека украинскиот суд дозволил апсење на Медведчук, пренесе РИА Новости.
Тој е во домашен притвор од мај 2021 година, од каде, како што соопшти Министерството за внатрешни работи на Украина, побегнал на 28 февруари, четири дена по рускиот напад на Украина и оттогаш се води како исчезнат.
Украинските власти го сомничат Медведчук за велепредавство и обиди за грабеж на националните ресурси на Крим, кој Москва го анектираше во 2014 година.
Медведчук е еден од најбогатите луѓе во Украина, а Форбс неговото богатство го проценува на 620 милиони долари.
Во Украина, Медведчук важи за сојузник на рускиот претседател Владимир Путин, кој го нарекува „личен пријател“.