Објавената веста дека рускиот претседател Владимир Путин им наложил на Централната банка на Русија и Владата на Русија во рок од една недела да подготват платен механизам за наплата на испораките на природен гас во руски рубљи за земјите кои што Русија ги прогласи за „непријателски земји“, повторно направи турбуленции на пазарот на енергенси. На официјалните интернет страници на посочените јавни руски институции до моментов нема официјално соопштение за преземени активности во врска со оваа информација. Од Народната банка за Денар велат дека засега не е доставен официјален допис, ниту било какво известување поврзано со оваа објава.
„Со Одлуката за начинот на формирање и објавување на курсевите на Народна банка е дефинирано дека Народна банка формира средни курсеви за странските валути коишто се утврдени во Курсната листа. Средните курсеви за странските валути се користат за книговодствено искажување на побарувањата и обврските изразени во странски платежни средства согласно со прописите за сметководствено работење и за потребите на платниот биланс. Согласно точка 4 од Одлуката, средните курсеви за останатите валути од Курсната листа, освен за средниот курс на денарот во однос на еврото, се пресметуваат врз основа на дневните референтни курсеви на еврото со останатите валути, објавени од страна на Европската централна банка. Врз основа на соопштението од Европската централна банка од 2 март, 2022 година дека не е во позиција да го објавува референтниот девизен курс на руската рубља во однос на еврото поради тековно недоволниот обем на тргување и во согласност со Одлуката за начинот на формирање и објавување на курсевите на Народната банка на Република Северна Македонија, Народната банка на Република Северна Македонија информираше дека среден курс на денарот во однос на руската рубља е последно објавен на курсната листа со важност од 2 март 2022 година“, велат од Народната банка на Македонија.
Од Народна банка уверуваат дека и натаму внимателно ќе ги следат информациите од официјални извори заради навремено преземање на сите неопходни активности коишто се во нејзина надлежност. Во изминатите години, прометот со руската рубља на домашниот девизен пазар е незначителен, но од централната банка без разлика, велат дека со внимание ги следат состојбите на меѓународните пазари на валути и ги разгледуваат можностите во случај на евентуална потреба од тргување со оваа валута.
Според достапните информации Европската унија го одби прелогот на официјална Москва, односно да го плаќаат рускиот природен гас во рубљи. Информациите кои пристигнаа од Брисел се дека договорите со руската федерација се постигнати валутите евра или долари. Но лидерите на земјите членки не се согласни во ставот да и воведат на Русија санкции во енергетскиот сектор, како што се едногласни со останатите воведени санкции. Официјалните податоци се дека лани Европа доби над 150 милијарди кубни метри гас од Русија, а тоа претставува 40 проценти од вкупниот увоз на стариот континент. Ваквите неизвесности повторно ја кренаа цената на природниот гас кој во последниве месеци руши рекорди по однос на цената на светските берзи.
И.П
