Уапсен поранешниот бугарски премиер Бојко Борисов

Бојко Борисов, поранешен бугарски премиер и лидер на десноцентристичката опозициска партија ГЕРБ, беше уапсен во четвртокот вечерта како дел од полициска операција поврзана со истрагите на Европското јавно обвинителство, соопшти бугарското Министерство за внатрешни работи.

Уапсени се и поранешниот министер за финансии Владислав Горанов, поранешната претседателка на собраниската комисија за буџет Менда Стојанова и советничката на Борисов за медиуми Севдалина Арнаудова, се вели во соопштението на Министерството.

„Во тек е голема операција во врска со 120 случаи на Европското обвинителство во Бугарија. Се вршат претреси и заплени на многу адреси. Бојко Борисов, Владислав Горанов, Менда Стојанова и Севдалина Арнаудова во моментов се во притвор“, соопшти бугарското министерство.