Швајцарските банки, ценети по нивната тајност на сметките и безбедноста, направија ретка проценка на средствата депонирани кај нив од руски клиенти.
Здружението на банкари на таа земја објави дека меѓу 150 и 200 милијарди швајцарски франци (160-213 милијарди долари) пари на руски клиенти се чуваат на швајцарски сметки, пренесува Раша тудеј.
Ова откритие е невообичаено за Швајцарија, која е омилена од најбогатите луѓе во светот како даночен рај и едно од најбезбедните места за складирање на богатството.
Аналитичарите велат дека објавените бројки покажуваат дека реалниот обем на рускиот бизнис со швајцарските банки е далеку поголем од оној што е претставен во билансите на состојба објавени досега од неколку финансиски компании.
Откажувајќи се од традицијата на неутралност, Швајцарија се приклучи на санкциите против Русија поради воената операција во Украина минатиот месец, а претседателот Игнасио Касис најави дека земјата ќе ги замрзне средствата на рускиот претседател Владимир Путин и на 370 политичари и бизнисмени санкционирани од Европската унија. Овој потег е опишан како начин да се спречат оние кои се наводно блиски до руската влада да финансираат воен напад на Украина без преседан.
Аналитичарите веруваат, врз основа на бројките објавени од неколку швајцарски финансиски институции, дека може да се управува со директна изложеност на швајцарските банки кон руски клиенти. Двете најголеми банки во земјата, UBS и Credit Suisse, објавија ограничена изложеност кон Русија минатата недела.
Credit Suisse, на пример, објави дека само 4 отсто од депозитите ставени кај нив се на Руси. Сепак, според извештајот на банката за 2021 година, овие средства изнесуваат околу 33 милијарди швајцарски франци (35 милијарди долари).
Според проценката на Здружението на банките, за да ги затворат чешмите со пари за руските клиенти, на швајцарските власти им останува уште долг пат да избројат колку руски пари стојат во нивните трезори, заклучуваат руските медиуми.
Извршниот директор на UBS, Ралф Хамерс изјави дека не може да даде точни информации за бројот на санкционирани клиенти, бидејќи тој се менува буквално секој ден. Секоја вечер излегуваат нови списоци… во основа секој Русин, секое лице со руски пасош е полусанкционирано, рече Хамерс.
