Руските и украинските власти во неделата ја изнесоа најветувачката оценка за напредокот во разговорите досега, сугерирајќи дека е прашање на денови кога ќе се постигнат позитивни резултати, а САД гледаат знаци на напредок.
„Во принцип нема да попуштиме на ниту една позиција. Русија сега го разбира тоа. Русија веќе почнува да разговара конструктивно“, вели украинскиот преговарач и претседателски советник Михаил Подољак во видеото објавено на интернет.
„Мислам дека ќе постигнеме некои резултати буквално за неколку дена“, рече тој.
Рускиот пратеник Леонид Слуцки изјави дека е постигнат значителен напредок во преговорите, неговата изјава ја пренесе агенцијата РИА.
„Според моите лични очекувања, овој напредок во наредните денови би можел да прерасне во заеднички став на двете делегации, во документи за потпишување“, рече Слуцки.
Ниту една страна не откри што ќе опфаќа договорот.
Двете страни се огласија на 18-тиот ден од руската инвазија на Украина, која Кремљ ја нарекува специјална воена операција.
Илјадници се убиени, а повеќе од 2,5 милиони Украинци досега избегаа од руската агресија. Украина е подготвена да преговара, но не и да се предаде или да прифати руски ултиматуми. Подољак на Твитер напиша дека Русија внимателно ги слуша украинските предлози. „Нашите барања се – крај на војната и повлекување на руските војници. Забележувам разбирање и има дијалог“, рече тој.
Три рунди разговори во Белорусија, од кои последниот се одржа минатиот понеделник, главно се фокусираа на хуманитарни прашања, што доведе до ограничено отворање на хуманитарни коридори за евакуација на цивили од конфликтните зони.
Рускиот претседател Владимир Путин во петокот изјави дека има „позитивен развој“ во разговорите, но не објасни.
Кремљ во саботата соопшти дека разговорите меѓу руските и украинските претставници продолжуваат во „видео формат“.
САД го поздравуваат напредокот
Русија покажува знаци на подготвеност да се вклучи во суштински преговори за Украина, иако сегашната намера на Москва е да го „уништи“ својот сосед, изјави во неделата заменик-државниот секретар на САД, Венди Шерман.
Во интервју за Fox News Sunday, Шерман рече дека САД вршат „огромен притисок“ врз Путин да ја запре повеќенеделната инвазија на Украина и да дозволи хуманитарни коридори за цивилите да бегаат.
„Тоа може да се случи. Гледаме некои знаци на вистински, сериозни преговори. Но, морам да кажам дека засега се чини дека Владимир Путин има намера да ја уништи Украина“, рече Шерман.
